မန္တလေးတိုင်းဒေသကြီး၊ မန္တလေးမြို့အနီးဝန်းကျင်နှင့် မတ္တရာမြို့နယ်အတွင်းရှိ လှေစပ်လုပ်ငန်းများသည် လှေစပ်ရာတွင် အသုံးပြုရသည့် ကျွန်းသစ်များ တရားဝင်ဝယ်ယူရရှိရန် ခက်ခဲလာခြင်းနှင့် သစ်ဈေးနှုန်းများ ယခင်နှစ်များထက် ၅ ဆကျော်အထိ အဆမတန် မြင့်တက်လာခြင်းတို့ကြောင့် လုပ်ငန်းများ လုံးဝရပ်နားထားရကြောင်း ဇူလိုင်လ ၆ ရက်နေ့တွင် လှေလုပ်ငန်းရှင်များ၏ ပြောပြချက်အရ သိရသည်။ ပြီးခဲ့သည့်နှစ်များက ၁၂ တောင်လှေတစ်စီးလျှင် ငွေကျပ် သိန်း ၂၀ ဝန်းကျင်သာ ရှိခဲ့သော်လည်း လက်ရှိသစ်ဈေးနှုန်းများအရ သိန်း ၈၀ မှ ၁၀၀ ကြားအထိ ကျခံရမည့်အခြေအနေ ဖြစ်နေသည့်အပြင် ဧရာဝတီမြစ်ရိုးတစ်လျှောက် နယ်မြေမတည်ငြိမ်မှုများကြောင့် ဒေသခံများ ရှောင်တိမ်းပြေးလွှားနေရသဖြင့် လှေအသစ်အပ်နှံသူ လုံးဝမရှိသလောက် နည်းပါးသွားခြင်းဖြစ်သည်။ သို့သော်လည်း လက်ရှိအချိန်တွင် မဖြစ်မနေ သွားလာသယ်ယူပို့ဆောင်ရန်အတွက် ကုန်ကျစရိတ် ထက်ဝက်ကျော် သက်သာပြီး ပေါ့ပါးသည့် ဖိုင်ဘာလှေငယ်များနှင့် အပေါ့စား သံခွန်စက်တပ်လှေများကိုသာ အခြားဒေသများမှတစ်ဆင့် မှာယူအသုံးပြုသူများ ရှိလာကြောင်း သိရသည်။
