တောင်ကိုရီးယားတွင် ဝယ်လိုအားမြင့်တက်လာမှုကြောင့် ဂျပန်ဘီယာတင်သွင်းမှုတန်ချိန် ၁ သိန်းကျော်လွန်ကာ ထိပ်ဆုံးမှ ဦးဆောင်

တောင်ကိုရီးယားနိုင်ငံ စားနပ်ရိက္ခာနှင့် ဆေးဝါးကွပ်ကဲမှုဦးစီးဌာန၏ "၂၀၂၆ သွင်းကုန်စားသောက်ကုန် စစ်ဆေးရေးနှစ်ချုပ်အစီရင်ခံစာ" အရ ၂၀၂၅ ခုနှစ်အတွင်း ဂျပန်နိုင်ငံမှ ဘီယာတင်သွင်းမှုပမာဏသည် ပြီးခဲ့သည့်နှစ်ထက် ၂၂ ရာခိုင်နှုန်း မြင့်တက်ခဲ့ပြီး ၁၀၀,၃၂၂ တန်အထိ ရှိလာရာ၊ နှစ်အလိုက်တင်သွင်းမှုတွင် ပထမဆုံးအကြိမ်အဖြစ် တန်ချိန် ၁ သိန်းကျော် စံချိန်တင်သွားခဲ့ကြောင်း သိရသည်။ ၂၀၁၉ ခုနှစ်က နှစ်နိုင်ငံဆက်ဆံရေး တင်းမာမှုကြောင့် ဖြစ်ပွားခဲ့သော "No Japan" ဂျပန်ကုန်ပစ္စည်းသပိတ်မှောက်မှုလှုပ်ရှားမှုကြောင့် ၂၀၂၀ နှင့် ၂၀၂၁ ခုနှစ်များတွင် ဂျပန်ဘီယာတင်သွင်းမှုသည် တန်ချိန် ၁ သောင်းပင် မပြည့်ဘဲ သိသာစွာ ထိုးဆင်းသွားခဲ့သော်လည်း၊ မကြာသေးမီနှစ်များအတွင်း ဆက်ဆံရေးပြန်လည်ကောင်းမွန်လာမှု၊ ခရီးသွားလာမှုမြင့်တက်လာမှုနှင့်အတူ လူငယ်စားသုံးသူ (Gen Z) များ၏ ဝယ်လိုအားကြောင့် ယခုကဲ့သို့ အရှိန်အဟုန်ဖြင့် ပြန်လည်ဦးမော့လာခြင်း ဖြစ်သည်။လက်ရှိတွင် တောင်ကိုရီးယား၏ စုစုပေါင်းဘီယာသွင်းကုန် တန်ချိန် ၂၄၀,၄၄၂ အနက် ဂျပန်ဘီယာက ၄၁.၇ ရာခိုင်နှုန်းဖြင့် စျေးကွက်ဝေစု အများဆုံးရယူကာ နံပါတ်တစ်နေရာ၌ ရပ်တည်နေပြီး၊ ယခင်က စျေးကွက်ကို ကြီးစိုးခဲ့သော ဥရောပသမဂ္ဂ (EU) ဘီယာတင်သွင်းမှုမှာမူ တန်ချိန် ၆၃,၁၆၁ သို့ ဆက်တိုက်ကျဆင်းသွားခဲ့ကြောင်း ဖော်ပြထားသည်။