ဒေသထွက်ကုန်ကြမ်းများကို အခြေခံသည့် MSME ကုန်ထုတ်လုပ်မှုကို အဓိကတွန်းအားပေးရန် မွန်ပြည်နယ်ဝန်ကြီးချုပ် မှာကြား

မွန်ပြည်နယ်အတွင်းရှိ MSME (အသေးစား၊ အလတ်စား စီးပွားရေး) လုပ်ငန်းများအတွက် ဒေသတွင်း အလွယ်တကူရရှိနိုင်သည့် သဘာဝသယံဇာတများနှင့် စိုက်ပျိုးမွေးမြူရေးအခြေခံ ကုန်ကြမ်းများကို အသုံးပြုသည့် ကုန်ထုတ်လုပ်မှုကို အဓိကထား တွန်းအားပေးဆောင်ရွက်ရန် မွန်ပြည်နယ်ဝန်ကြီးချုပ် ဦးအောင်ဝင်းသန်းက မှာကြားလိုက်ကြောင်း သိရသည်။ ဇူလိုင်လ ၃ ရက် ညနေပိုင်းက မော်လမြိုင်မြို့၊ ပြည်နယ်အစိုးရအဖွဲ့ရုံး၌ ကျင်းပသည့် နိုင်ငံတော်အကြီးအကဲ၏ လမ်းညွှန်ချက်များ ထပ်ဆင့်ရှင်းလင်းပွဲတွင် ဝန်ကြီးချုပ်က ထည့်သွင်းပြောကြားခဲ့ခြင်းဖြစ်ပြီး၊ တိုင်းပြည်သာယာဝပြောရေးအတွက် စိုက်ပျိုးမွေးမြူရေးကို အခြေခံသည့် ကုန်ထုတ်လုပ်မှုများကို မြှင့်တင်ရမည်ဖြစ်ကြောင်းနှင့် ဌာနဆိုင်ရာများအနေဖြင့် ပြည်နယ်အစိုးရနှင့် နိုင်ငံတော်အကြီးအကဲတို့၏ လမ်းညွှန်ချက်များကို ကဏ္ဍအလိုက် အရှိန်အဟုန်မပြတ် ဆက်စပ်ဆောင်ရွက်သွားကြရန် မှာကြားခဲ့သည်။