ရန်ကုန်မှ ပါမောက္ခနှင့် အထူးကုဆရာဝန်ကြီး ၁၂ ဦးအဖွဲ့ ပြည်မြို့တွင် ပဲခူးနှင့် မကွေးတိုင်းရှိ မြို့နယ် ၁၆ ခုမှ ဒေသခံ ၂,၀၀oနီးပါးကို အခမဲ့ ကွင်းဆင်းကုသပေး

ရန်ကုန်မြို့ မြောက်ဥက္ကလာပပြည်သူ့ဆေးရုံကြီးနှင့် သင်္ဃန်းကျွန်းပြည်သူ့ဆေးရုံကြီးတို့မှ ပါမောက္ခနှင့် အထူးကုဆရာဝန်ကြီး (၁၂) ဦး ပါဝင်သောအဖွဲ့သည် ဇွန်လ ၁၃ ရက်နှင့် ၁၄ ရက်တို့တွင် ပြည်မြို့သို့ သွားရောက်ကာ ဒေသခံပြည်သူများကို အခမဲ့ ကွင်းဆင်းဆေးကုသမှုများ ဆောင်ရွက်ပေးခဲ့ကြောင်း ကျန်းမာရေးဝန်ကြီးဌာနထံမှ သိရသည်။ ယခုကွင်းဆင်းကုသမှုတွင် ပြည်မြို့နယ်အပြင် ပဲခူးတိုင်းဒေသကြီးနှင့် မကွေးတိုင်းဒေသကြီးအတွင်းရှိ မြို့နယ်ပေါင်း (၁၆) မြို့နယ်မှ လာရောက်ပြသကြသည့် ဒေသခံပြည်သူ စုစုပေါင်း (၂,၀၀၀) နီးပါးကို အခမဲ့ ကျန်းမာရေးစောင့်ရှောက်မှု ပေးနိုင်ခဲ့ကြောင်း သိရသည်။