ရှမ်းပြည်နယ်၊ ပင်းတယတွင် ဆေးဝါးဈေးနှုန်းများ အဆမတန်မြင့်တက်မှုကြောင့် ဒေသခံများ အခက်ကြုံနေရ

ရှမ်းပြည်နယ်တောင်ပိုင်း ပင်းတယမြို့နယ်တွင် အခြေခံစားသောက်ကုန်များအပြင် နေ့စဉ်သောက်သုံးရသည့် ဆေးဝါးဈေးနှုန်းများပါ အဆမတန်မြင့်တက်လာသဖြင့် ဒေသခံများ အခက်အခဲကြုံတွေ့နေရသည်။ သွေးတိုးကျဆေးတစ်ကတ်လျှင် ယခင် ၄၀၀ ကျပ်ဝန်းကျင်မှ ၁,၂၀၀ ကျပ်အထိလည်းကောင်း၊ ငှက်သိုက်အားဆေးမှာ ၈,၀၀၀ ကျပ်မှ ၁၂,၅၀၀ ကျပ်အထိလည်းကောင်း၊ သက်ကြီးရွယ်အိုများအတွက် မော်ရာမင်းဆေးမှာ ၂ သောင်းကျော်မှ ၆ သောင်း၊ ၇ သောင်းအထိလည်းကောင်း ဈေးနှုန်းများ မြင့်တက်လာခြင်းဖြစ်သည်။ ထို့ပြင် ဆေးဝါးအချို့ကို ဆိုင်ပြောင်း၍ လိုက်လံရှာဖွေဝယ်ယူနေရသည့်အထိ ဝယ်ယူရခက်ခဲလာသဖြင့် ကျေးလက်ဒေသရှိ နာတာရှည်ရောဂါဝေဒနာရှင်များနှင့် လက်လုပ်လက်စား မိသားစုများမှာ ကျန်းမာရေးကုန်ကျစရိတ် ပိုမိုကြီးမားကာ အကျပ်အတည်းဖြစ်နေကြသည်။