ကယားပြည်နယ်၊လွိုင်ကော်မြို့ ဘီလူးချောင်း၌ မေလတစ်လအတွင်း လူ၅ ဦး ‌ရေနစ်သေဆုံး

ကယား (ကရင်နီ)ပြည်၊ လွိုင်ကော်မြို့ပေါ်ရှိ ဘီလူးချောင်းအတွင်း ပြီးခဲ့သည့် မေလတစ်လအတွင်း ရေနစ်သေဆုံးမှုအပြင် အကြောင်းအမျိုးမျိုးကြောင့် ပြည်သူ ၅ ဦး (အမျိုးသား ၄ ဦးနှင့် အမျိုးသမီး ၁ ဦး) သေဆုံးခဲ့ကြောင်း ကန္တာရဝတီတိုင်း(မ်) သတင်းဌာန၏ စာရင်းများအရ သိရသည်။ မေလ ၁၀ ရက်နေ့က ဝမ်းကွဲမောင်နှမ ၃ ဦး ရေဆင်းချိုးရာမှ ရေနစ်သေဆုံးခဲ့သည့် ဖြစ်စဉ်ရှိခဲ့ပြီး၊ မေလ ၇ ရက်နှင့် ၁၃ ရက်နေ့များတွင်မူ မည်သည့်ဖြစ်စဉ်ကြောင့် သေဆုံးသည်ကို မသိရဘဲ အမျိုးသား ၂ ဦး၏ ရုပ်အလောင်းများကိုသာ ဆယ်ယူရရှိခဲ့ခြင်း ဖြစ်သည်။ ဘီလူးချောင်းအတွင်း ယခုကဲ့သို့ မကြာခဏ အလောင်းများ တွေ့ရှိရမှုနှင့် ပတ်သက်၍ သေဆုံးပြီးမှ တွေ့ရသည့် အလောင်းအချို့မှာ ရိုးရိုးရေနစ်သေဆုံးခြင်း ဟုတ်၊ မဟုတ် မြို့ခံများအကြား သံသယဖြစ်မှုများ ရှိနေသည်။ ပြီးခဲ့သည့် လများတွင်လည်း ခန္ဓာကိုယ်အစိတ်အပိုင်း တစ်ဝက်သာကျန်ရှိတော့သည့် ရုပ်အလောင်းတစ်ခုကို ဘီလူးချောင်းအတွင်း ရှာဖွေတွေ့ရှိခဲ့သဖြင့် ရွှေညောင်ပင်လူမှုကူညီရေးအသင်းက မြေမြှုပ်သင်္ဂြိုဟ်ပေးခဲ့ဖူးကြောင်း သိရသည်။