ယူအေအီးရှိ (Emirates) လေကြောင်းလိုင်းက အီဘိုလာဗိုင်းရပ်စ် ကူးစက်မှုကြောင့် ကန့်သတ်ချက်ရှိသည့် နိုင်ငံများသို့ ခရီးသွားလာရာတွင် သတိပြုရန် သတိပေးချက်ထုတ်ပြန်

အာဖရိကအလယ်ပိုင်း ဒေသအချို့တွင် အီဘိုလာ (Ebola) ဗိုင်းရပ်စ် ကူးစက်မှုအသစ်များ ပြန်လည်ဖြစ်ပွားနေခြင်းကြောင့် ကမ္ဘာ့နိုင်ငံအသီးသီးက ခရီးသွားလာမှု ကန့်သတ်ချက်များ တင်းကျပ်စွာ စတင်ချမှတ်လာကြရာ ဒူဘိုင်းအခြေစိုက် အီမရိတ်စ် (Emirates) လေကြောင်းလိုင်းက ခရီးသည်များအတွက် အထူးသတိပေးချက်တစ်ရပ် ထုတ်ပြန်လိုက်သည်။ကွန်ဂိုဒီမိုကရက်တစ်သမ္မတနိုင်ငံ (DRC)၊ ယူဂန်းဒါး နှင့် တောင်ဆူဒန်နိုင်ငံတို့တွင် အီဘိုလာဗိုင်းရပ်စ်ပိုး (Bundibugyo strain) ကူးစက်မှု မြင့်တက်လာခြင်းကြောင့် ကမ္ဘာ့ကျန်းမာရေးအဖွဲ့ (WHO) က နိုင်ငံတကာပြည်သူ့ကျန်းမာရေး အရေးပေါ်အခြေအနေအဖြစ် ကြေညာထားသည်။ အီမရိတ်စ်လေကြောင်းလိုင်းက အဆိုပါကန့်သတ်ချက်ရှိသော လမ်းကြောင်းများသို့ ခရီးစဉ်ပျံသန်းမည့် ခရီးသည်များအနေဖြင့် မိမိတို့သွားရောက်မည့် သက်ဆိုင်ရာနိုင်ငံများ၏ ပြည်ဝင်ခွင့်နှင့် ကျန်းမာရေးစည်းမျဉ်းများကို မပျံသန်းမီ သေချာစွာ ကြိုတင်စစ်ဆေးကြရန်နှင့် လေဆိပ်များတွင် စစ်ဆေးမှုများကြောင့် ခရီးစဉ်ကြန့်ကြာမှုများ ရှိနိုင်ကြောင်း သတိပေးနှိုးဆော်ထားသည်။ ယူအေအီး ကျန်းမာရေးဝန်ကြီးဌာနအနေဖြင့်လည်း အခြေအနေကို အနီးကပ်စောင့်ကြည့်လျက်ရှိပြီး အမျိုးသားအဆင့် ကျန်းမာရေးစောင့်ကြပ်ကြည့်ရှုမှုစနစ်များကို အဆင့်မြှင့်တင်ထားကြောင်း သိရသည်။