ဂျပန်နိုင်ငံ၌ ငွေကြေးစွက်ဖက်မှုအချက်အလက် စောင့်ကြည့်နေစဉ် ယန်းငွေလဲနှုန်း တစ်ဒေါ်လာ ၁၆၀ နီးပါးသို့ ပြန်ရောက်

ဂျပန်ဘဏ္ဍာရေးဝန်ကြီးဌာနသည် ယန်းငွေတန်ဖိုးကျဆင်းမှုကို ကာကွယ်ရန် မည်မျှအထိ ဝင်ရောက်စွက်ဖက် (Intervention) ခဲ့သည်ဆိုသည့် တရားဝင်အချက်အလက်များကို လာမည့်သောကြာနေ့တွင် ထုတ်ပြန်မည်ဖြစ်သည်။ ကနဦးဆန်းစစ်ချက်များအရ ဂျပန်အာဏာပိုင်များသည် ဧပြီလကုန်မှ မေလဆန်းအတွင်း ယန်းငွေတန်ဖိုးမြှင့်တင်ရန်အတွက် ဂျပန်ယန်း ၁၀ ထရီလီယံ (အမေရိကန်ဒေါ်လာ ၆၃ ဘီလီယံခန့်) အထိ စံချိန်တင်သုံးစွဲခဲ့ဖွယ်ရှိကြောင်း သိရသည်။ သို့သော်လည်း အစိုးရ၏ ကြားဝင်ဆောင်ရွက်မှုများရှိလင့်ကစား လက်ရှိတွင် ယန်းငွေလဲနှုန်းမှာ တစ်ဒေါ်လာလျှင် ၁၆၀ ယန်းဝန်းကျင်၌ပင် ဆက်လက်ရှိနေသဖြင့် ၎င်းစွက်ဖက်မှုများ၏ ထိရောက်မှုအပေါ် စျေးကွက်အတွင်း မေးခွန်းထုတ်မှုများ ရှိနေသည်။