ရှမ်းပြည်နယ်အရှေ့ပိုင်း၊ တာချီလိတ်မြို့တွင် ယမန်နေ့ မေလ ၉ ရက် နံနက်အစောပိုင်းက လျှပ်စစ်ဓာတ်တိုင်မှတစ်ဆင့် နေအိမ်အတွင်းသို့ ဖောက်ထွင်းဝင်ရောက်မှုတစ်ခု ဖြစ်ပွားခဲ့ကြောင်း သိရသည်။အဆိုပါဖြစ်စဉ်တွင် အမျိုးသားနှစ်ဦးက ဓာတ်တိုင်ကို အသုံးပြုကာ နေအိမ်အတွင်းသို့ ကျူးကျော်ဝင်ရောက် ခိုးယူခဲ့ခြင်းဖြစ်ပြီး ပတ်ဝန်းကျင်၏ ဝိုင်းဝန်းဖမ်းဆီးမှုကြောင့် ၎င်းတို့အနက် အမျိုးသားတစ်ဦးကို လက်ရဖမ်းဆီးရမိခဲ့သည်။ ဖမ်းဆီးရမိသူအား စစ်ဆေးမေးမြန်းရာတွင် မူးယစ်ဆေးဝါး သုံးစွဲထားကြောင်း စစ်ဆေးတွေ့ရှိခဲ့ရပြီး လွတ်မြောက်သွားသည့် ကျန်ရှိသူတစ်ဦးကိုလည်း ဆက်လက်ရှာဖွေလျက်ရှိကြောင်း သိရှိရပါသည်။
