ဂျပန်၌ ဗီဇာစည်းကမ်းများ တင်းကျပ်လိုက်ခြင်းကြောင့် ပြည်ပလုပ်ငန်းရှင်များ အခက်တွေ့နေရပြီး အချို့မှာ လုပ်ငန်းပိတ်သိမ်းရန် စဉ်းစားနေ

ဂျပန်နိုင်ငံတွင် အခြေစိုက်သည့် ပြည်ပလုပ်ငန်းရှင်များသည် ပြီးခဲ့သည့် အောက်တိုဘာလမှစတင်၍ ပြောင်းလဲကျင့်သုံးခဲ့သော တင်းကျပ်သည့် ဗီဇာစည်းမျဉ်းများကြောင့် လုပ်ငန်းလည်ပတ်ရာတွင် ကြီးမားသော ဖိအားများကို ရင်ဆိုင်နေရကြောင်း Tokyo Shoko Research (TSR) ၏ စစ်တမ်းတစ်ခုအရ သိရသည်။ အဆိုပါစစ်တမ်းကို ၂၀၂၆ ခုနှစ်၊ ဧပြီလ ၃၀ ရက်နေ့တွင် Japan Times က ဖော်ပြခဲ့ခြင်းဖြစ်ပြီး၊ ပြည်ပလုပ်ငန်းရှင် ၅ ရာခိုင်နှုန်းခန့်မှာ လုပ်ငန်းများ လုံးဝပိတ်သိမ်းရန် စဉ်းစားနေကြကာ ၄၅ ရာခိုင်နှုန်းမှာ လုပ်ငန်းလည်ပတ်မှုအပေါ် ဆိုးကျိုးများ သက်ရောက်လာနိုင်ကြောင်း ခန့်မှန်းထားကြသည်။အဓိက အပြောင်းအလဲမှာ "Business Manager" (စီးပွားရေးစီမံခန့်ခွဲမှု) ဗီဇာအတွက် လိုအပ်သည့် အနည်းဆုံး ရင်းနှီးမြှုပ်နှံမှု ပမာဏကို ယခင် ယန်း ၅ သန်းမှ ယန်း ၃၀ သန်း (၆ ဆခန့်) အထိ တိုးမြှင့်လိုက်ခြင်း ဖြစ်ပါသည်။ ထို့အပြင် အနည်းဆုံး အချိန်ပြည့်ဝန်ထမ်း တစ်ဦး မဖြစ်မနေ ခန့်အပ်ရမည်ဟူသော စည်းကမ်းချက်မှာလည်း အသေးစား လုပ်ငန်းရှင်များအတွက် ဝန်ထုပ်ဝန်ပိုး ဖြစ်စေခဲ့သည်။ အထူးသဖြင့် ပြည်ပလုပ်ငန်းရှင်ပိုင် စားသောက်ဆိုင်ငယ်လေးများနှင့် အသေးစား ကုန်သွယ်ရေးလုပ်ငန်းများမှာ အခက်ခဲဆုံး ဖြစ်နေကြသည်။အစိုးရဘက်ကမူ ဤကဲ့သို့ စည်းကမ်းတင်းကျပ်ရခြင်းမှာ စီးပွားရေးလုပ်ငန်း အယောင်ဆောင်၍ ဗီဇာရယူနေမှုများကို တားဆီးရန်ဖြစ်သည်ဟု ဆိုသော်လည်း၊ ပညာရှင်များကမူ ယင်းသည် ဂျပန်နိုင်ငံ၏ "ဘက်စုံယဉ်ကျေးမှု အတူယှဉ်တွဲနေထိုင်ရေး" မူဝါဒနှင့် ဆန့်ကျင်ဘက်ဖြစ်နေပြီး တရားဝင် ရိုးရိုးသားသား လုပ်ကိုင်နေသည့် လုပ်ငန်းရှင်ငယ်များကို ထိခိုက်စေကြောင်း ထောက်ပြထားကြသည်။ လက်ရှိတွင် ဗီဇာသက်တမ်းတိုးရန် ခက်ခဲလာခြင်းနှင့် ကုန်ကျစရိတ် မြင့်မားလာခြင်းတို့ကြောင့် ဂျပန်နိုင်ငံရှိ ပြည်ပစီးပွားရေး အသိုက်အဝန်းအတွင်း စိုးရိမ်ပူပန်မှုများ မြင့်တက်လျက်ရှိကြောင်း သိရပါသည်။