ဂျပန်စွန့်ဦးတည်ထောင်သူအဖွဲ့တစ်ခုက ကြောင်များ၏ ကျောက်ကပ်ရောဂါအတွက် ကုသဆေးအသစ်ကို ခွင့်ပြုချက်ရယူရန် လျှောက်ထား

ဂျပန်နိုင်ငံ၊ တိုကျိုအခြေစိုက် "Institute for AIM Medicine" သည် ကြောင်များတွင် အဖြစ်များပြီး လက်ရှိအချိန်ထိ အမြစ်ပြတ်ပျောက်ကင်းအောင် မကုသနိုင်သေးသည့် နာတာရှည်ကျောက်ကပ်ရောဂါ (Chronic Kidney Disease) အတွက် ကုသဆေးအသစ်ကို စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာနထံ ၂၀၂၆ ခုနှစ်၊ ဧပြီလ ၂၄ ရက်နေ့ (သောကြာနေ့) တွင် ခွင့်ပြုချက်ရယူရန် တရားဝင်တင်ပြခဲ့ကြောင်း ၂၀၂၆ ခုနှစ်၊ ဧပြီလ ၂၇ ရက်နေ့တွင် Japan Times က ဖော်ပြခဲ့သည်။ တိုကျိုတက္ကသိုလ်မှ ပါမောက္ခဟောင်းဖြစ်သူ ဒေါက်တာ တိုရူ မိယာဇာကီ (Toru Miyazaki) ဦးဆောင်သော ဤသုတေသနအဖွဲ့သည် AIM ဟုခေါ်သော ပရိုတင်းဓာတ်ကို အသုံးပြုကာ ကြောင်များ၏ ကျောက်ကပ်အတွင်း ပိတ်ဆို့နေသည့် ဆဲလ်သေများကို ဖယ်ရှားပေးနိုင်မည့် နည်းလမ်းကို ရှာဖွေတွေ့ရှိခဲ့ခြင်းဖြစ်သည်။စမ်းသပ်လေ့လာမှုများအရ ဆေးကုသမှုခံယူခဲ့သော ကြောင်များ၏ တစ်နှစ်တာအတွင်း အသက်ရှင်နိုင်ခြေမှာ ၈၀ ရာခိုင်နှုန်းမှ ၈၃ ရာခိုင်နှုန်းအထိရှိပြီး၊ ဆေးမထိုးရသေးသော ကြောင်များ၏ အသက်ရှင်နှုန်းမှာ ၂၀ ရာခိုင်နှုန်းသာရှိသဖြင့် ဤဆေးသည် ကြောင်များ၏ သက်တမ်းကို သိသိသာသာ ရှည်ကြာစေနိုင်ကြောင်း တွေ့ရှိရသည်။ အဆိုပါ သုတေသနသည် ကိုဗစ်-၁၉ ကပ်ရောဂါကာလအတွင်း ရန်ပုံငွေအခက်အခဲကြောင့် ခေတ္တရပ်နားခဲ့ရသော်လည်း ကြောင်ချစ်သူများထံမှ လှူဒါန်းငွေ ဂျပန်ယန်း သန်း ၃၀၀ နီးပါး ရရှိခဲ့သဖြင့် ဆက်လက်ဆောင်ရွက်နိုင်ခဲ့ခြင်းဖြစ်သည်။ ကြောင်များ၏ ၄၀ ရာခိုင်နှုန်းကျော်မှာ အသက် ၁၀ နှစ်ကျော်လျှင် ကျောက်ကပ်ရောဂါ ခံစားရလေ့ရှိရာ၊ ယခုဆေးကို ခွင့်ပြုချက်ရရှိပါက ကြောင်ပိုင်ရှင်များအတွက် ကြီးမားသော သတင်းကောင်းတစ်ခု ဖြစ်လာမည်ဖြစ်ကြောင်း သိရသည်။