မဲဆောက်တွင် ကျားသစ်နက်မှောင်ခိုကူးရန် ကြိုးပမ်းသည့် မြန်မာနှစ်ဦး ဖမ်းဆီးခံရ

ထိုင်းနိုင်ငံ၊ မဲဆောက်မြို့ရှိ ဈေးဝယ်စင်တာတစ်ခု၏ ကားပါကင်တွင် ဧပြီလ ၈ ရက်နေ့က (၇) လသားအရွယ် အာဖရိကကျားသစ်နက်တစ်ကောင်အား မြန်မာနိုင်ငံဘက်သို့ မှောင်ခိုကူးရန် ကြိုးပမ်းနေသည့် မြန်မာနိုင်ငံသားနှစ်ဦးကို ထိုင်းရဲတပ်ဖွဲ့က ဖမ်းဆီးခဲ့သည်။ အာဏာပိုင်များသည် ဘန်ကောက်မှ အမြန်ချောပို့ဖြင့် "ကြောင်" ဟု အမည်တပ်ကာ ပို့ဆောင်လိုက်သည့် တောရိုင်းတိရစ္ဆာန်အား စောင့်ကြည့်ဖော်ထုတ်ခဲ့ခြင်းဖြစ်ပြီး၊ ဖမ်းဆီးခံရသူများကမူ ၎င်းတို့မှာ ကျားသစ်နက်ဖြစ်ကြောင်း မသိရှိဘဲ မြဝတီရှိ မိတ်ဆွေတစ်ဦးထံ ပို့ဆောင်ပေးရန် ဘတ် ၂၅,၀၀၀ ဖြင့် ငှားရမ်းခံရခြင်းဖြစ်ကြောင်း ငြင်းဆိုထားသည်။အဆိုပါ ကျားသစ်နက်ပေါက်ကို မြန်မာနိုင်ငံ၊ ရွှေကုက္ကိုလ်ဒေသသို့ ပို့ဆောင်ရန် ရည်ရွယ်ထားပုံရပြီး ကမ္ဘောဒီးယား၊ ထိုင်းနှင့် မြန်မာနိုင်ငံတို့တွင် လှုပ်ရှားနေသည့် နိုင်ငံဖြတ်ကျော် တောရိုင်းတိရစ္ဆာန် မှောင်ခိုဂိုဏ်းနှင့် ဆက်နွှယ်နိုင်ကြောင်း အာဏာပိုင်များက ယူဆထားသည်။ လက်ရှိတွင် ကျားသစ်နက်အား ရတ်ချ်ဘူရီရှိ တောရိုင်းတိရစ္ဆာန် ကယ်ဆယ်ရေးစင်တာသို့ ပို့ဆောင်ကာ ပြုစုစောင့်ရှောက်ထားကြောင်း သိရှိရပါသည်။