ဗီယက်နမ်နိုင်ငံ၊ဟနွိုင်းမြို့တွင် အသက် ၅၆ နှစ်အရွယ် အမျိုးသမီးတစ်ဦး ကျန်းမာသန်စွမ်းသော အမွှာရင်သွေးများကို အောင်မြင်စွာ မွေးဖွား

ဗီယက်နမ်နိုင်ငံ၊ ဟနွိုင်းမြို့ရှိ သားဖွားနှင့် မီးယပ်ဆေးရုံကြီးတွင် အသက် ၅၆ နှစ်အရွယ် အမျိုးသမီးတစ်ဦးသည် သားဦးနှင့် သမီးဦး အမွှာရင်သွေးများကို ဧပြီလ ၆ ရက်နေ့တွင် ခွဲစိတ်မွေးဖွားခဲ့ကြောင်း ဧပြီလ ၈ ရက်နေ့ သတင်းများအရ သိရသည်။ အဆိုပါအမျိုးသမီးသည် ဖန်ပြွန်သန္ဓေသား (IVF) စနစ်ဖြင့် ကိုယ်ဝန်ရရှိခဲ့ခြင်းဖြစ်ပြီး အသက်အရွယ်ကြီးရင့်ခြင်း၊ ယခင်က ခွဲစိတ်ဖူးသည့် ရာဇဝင်ရှိခြင်းနှင့် ကိုယ်ဝန်ဆောင်ဆီးချိုရောဂါ ခံစားနေရခြင်းတို့ကြောင့် အန္တရာယ်များသော ကိုယ်ဝန်ဆောင်မှုအဆင့်တွင် ရှိနေခဲ့သူဖြစ်သည်။ဆရာဝန်များ၏ အနီးကပ်စောင့်ရှောက်မှုဖြင့် ကိုယ်ဝန် ၃၈ ပတ်အထိ အောင်မြင်စွာ သယ်ဆောင်နိုင်ခဲ့ပြီးနောက် ၂.၉ ကီလိုဂရမ်ရှိသော သားလေးနှင့် ၂.၄ ကီလိုဂရမ်ရှိသော သမီးလေးတို့ကို ဘေးကင်းစွာ မွေးဖွားနိုင်ခဲ့ခြင်းဖြစ်သည်။ ဆေးရုံအာဏာပိုင်များ၏ အဆိုအရ ဤဖြစ်စဉ်သည် အသက် ၅၀ ကျော် အမျိုးသမီးတစ်ဦးအတွက် အလွန်ရှားပါးပြီး အန္တရာယ်များသည့် မွေးဖွားမှုဖြစ်သော်လည်း ဆေးဘက်ဆိုင်ရာ ကျွမ်းကျင်မှုနှင့် မိခင်၏ ကြိုးပမ်းမှုကြောင့် အောင်မြင်ခဲ့ခြင်းဖြစ်သည်။ ဆရာဝန်များကမူ အသက် ၅၀ ကျော်မှ ကိုယ်ဝန်ဆောင်လိုသူများအနေဖြင့် အထူးကုဆေးရုံများတွင် စနစ်တကျ ပြသစစ်ဆေးရန် အကြံပြုထားသည်။