တရုတ်နိုင်ငံ ဒုတိယသမ္မတက ဆေးရှဲလ်စ်နိုင်ငံနှင့် ပူးပေါင်းဆောင်ရွက်မှု ပိုမိုနက်ရှိုင်းစေရန် တိုက်တွန်း

တရုတ်နိုင်ငံ ဒုတိယသမ္မတ ဟန်ကျိန့်က ဆေးရှဲလ်စ်နိုင်ငံနှင့် မဟာဗျူဟာမြောက် မိတ်ဖက်ဆက်ဆံရေး နက်ရှိုင်းစေရန်၊ ဆေးရှဲလ်စ်နိုင်ငံနှင့် လက်တွေ့ပူးပေါင်းဆောင်ရွက်မှု တိုးမြှင့်ရန် တိုက်တွန်းပြောကြားခဲ့ကြောင်း သိရသည်။မတ် ၂၈ ရက်မှ ၃၀ ရက်အထိ အဆိုပါကျွန်းနိုင်ငံသို့ သွားရောက်ခဲ့သည့် ခရီးစဉ်အတွင်း ဟန်သည် သမ္မတ ပက်ထရစ် ဟာမီနီ၊ ဒုတိယသမ္မတ ဆီဘက်ရှန် ပီလေးတို့နှင့် တွေ့ဆုံခဲ့ကာ နှစ်နိုင်ငံ သံတမန်ဆက်ဆံရေး ထူထောင်မှု နှစ် ၅၀ ပြည့် အထိမ်းအမှတ် ကြိုဆိုဧည့်ခံပွဲသို့လည်း တက်ရောက်ခဲ့သည်။ ဟာမီနီနှင့် တွေ့ဆုံဆွေးနွေးစဉ်အတွင်း ဟန်က တရုတ်နိုင်ငံ သမ္မတ ရှီကျင့်ဖိန်၏ နွေးထွေးလှိုက်လှဲသော နှုတ်ခွန်းဆက်စကားများနှင့် ဆုမွန်ကောင်း ပို့သမှုများကို ထပ်ဆင့်ပြောကြားခဲ့သည်။ ယခုနှစ်သည် တရုတ်နိုင်ငံနှင့် ဆေးရှဲလ်စ်နိုင်ငံတို့ သံတမန်ဆက်ဆံရေးထူထောင်မှု နှစ် ၅၀ ပြည့် အထိမ်းအမှတ် အခါသမယ ဖြစ်သည့်အားလျော်စွာ နှစ်နိုင်ငံဆက်ဆံရေးသည် အရွယ်အစားမတူညီသည့် နိုင်ငံများအကြား စစ်မှန်သော ချစ်ကြည်ရင်းနှီးမှု၊ တန်းတူညီမျှရှိမှု၊ အပြန်အလှန် ပံ့ပိုးကူညီမှု၊ နှစ်ဖက်စလုံးအတွက် အကျိုးရှိသော ပူးပေါင်းဆောင်ရွက်မှုတို့၏ စံနမူနာအဖြစ် တည်ရှိနေသည်ဟု ဟန်က ညွှန်းဆိုခဲ့သည်။