စင်ကာပူတွင် အစိုးရအရာရှိအယောင်ဆောင်၍ စင်ကာပူဒေါ်လာ ၆ သိန်းခွဲကျော်တန်ဖိုးရှိ ရွှေတုံးများ လိမ်လည်မှုဖြင့် အမျိုးသားတစ်ဦးကို တရားစွဲဆို

စင်ကာပူနိုင်ငံတွင် အစိုးရအာဏာပိုင်များအဖြစ် ဟန်ဆောင်ကာ သက်ကြီးရွယ်အိုတစ်ဦးထံမှ စင်ကာပူဒေါ်လာ ၆၅၄,၀၀၀ ခန့် တန်ဖိုးရှိသည့် ရွှေတုံးများကို လိမ်လည်ရယူခဲ့သည့် ဖြစ်စဉ်တွင် ပါဝင်ပတ်သက်သူ အမျိုးသားတစ်ဦးကို ရဲတပ်ဖွဲ့က ဖမ်းဆီးတရားစွဲဆိုလိုက်ကြောင်း သိရှိရပါသည်။ လိမ်လည်သူများသည် ရဲအရာရှိများအဖြစ် ဖုန်းဖြင့် ဆက်သွယ်ကာ နစ်နာသူအား ငွေကြေးခဝါချမှုတွင် ပါဝင်နေသည်ဟု ခြိမ်းခြောက်ပြောဆိုပြီး စစ်ဆေးရန်အတွက်ဟုဆိုကာ ရွှေတုံးများကို လူကိုယ်တိုင် လာရောက်ယူဆောင်သွားခဲ့ခြင်းဖြစ်သည်။ စင်ကာပူရဲတပ်ဖွဲ့က စုံစမ်းစစ်ဆေးမှုများ ပြုလုပ်ပြီးနောက် လိမ်လည်မှုတွင် ပါဝင်သည့် အသက် ၃၀ အရွယ် အမျိုးသားကို ဖမ်းဆီးနိုင်ခဲ့ကာ ၎င်းထံမှ ရွှေတုံးအချို့ကိုလည်း ပြန်လည်သိမ်းဆည်းရမိခဲ့သည်။ ယခုကဲ့သို့ အစိုးရဝန်ထမ်းအယောင်ဆောင် လိမ်လည်မှုများမှာ စင်ကာပူတွင် ပိုမိုများပြားလာသဖြင့် အာဏာပိုင်များက အထူးသတိပေးထားသည်။ အာဏာပိုင်များက ပြည်သူများအနေဖြင့် ဖုန်းဖြင့် ငွေကြေး သို့မဟုတ် အဖိုးတန်ပစ္စည်းများ တောင်းခံခြင်းကို လုံးဝမယုံကြည်ကြရန်နှင့် သံသယရှိပါက ရဲတပ်ဖွဲ့သို့ ချက်ချင်းအကြောင်းကြားရန် တိုက်တွန်းထားကြောင်း သတင်းတွင် ဖော်ပြထားပါသည်။