ကမ္ဘောဒီးယားနိုင်ငံ၏ အဓိက လောင်စာဆီကုမ္ပဏီကြီးတစ်ခုဖြစ်သည့် Sokimex ၏ လုပ်ငန်းလည်ပတ်မှုဆိုင်ရာ အခက်အခဲများကြောင့် လောင်စာဆီနှင့် LPG ဓာတ်ငွေ့များ ပြတ်လပ်တော့မည်ဆိုသည့် စိုးရိမ်ပူပန်မှုများ ထွက်ပေါ်နေသော်လည်း နိုင်ငံအတွင်း အိမ်သုံးအချက်အပြုတ်သုံး LPG ဓာတ်ငွေ့ ထောက်ပံ့မှုမှာ ပြတ်တောက်သွားမည်မဟုတ်ကြောင်း သတ္တုတွင်းနှင့် စွမ်းအင်ဝန်ကြီးဌာနက ပြည်သူများကို အာမခံချက်ပေးလိုက်ပါသည်။ စွမ်းအင်ဝန်ကြီး Keo Rottanak က ဗီဒီယိုမှတစ်ဆင့် သတင်းစကားပါးရာတွင် လက်ရှိ၌ LPG ဓာတ်ငွေ့ သိုလှောင်ရုံများတွင် လုံလောက်သော ပမာဏရှိနေပြီး အခြားသော တင်သွင်းသူများထံမှလည်း ပုံမှန်ဝင်ရောက်နေကြောင်း အတည်ပြုခဲ့သည်။ ဝန်ကြီးဌာနအနေဖြင့် ဈေးကွက်အတွင်း လောင်စာဆီဈေးနှုန်းများ မတန်တဆ မြင့်တက်မသွားစေရန် အနီးကပ် စောင့်ကြည့်နေပြီး နိုင်ငံတော်အဆင့် စွမ်းအင်လုံခြုံမှုအတွက် အရန်သိုလှောင်မှု အစီအစဉ်များကိုလည်း ပြင်ဆင်ထားကြောင်း သိရသည်။ အာဏာပိုင်များက ပြည်သူများအနေဖြင့် ထိတ်လန့်တကြား ဆီဝယ်ယူစုဆောင်းခြင်း (Panic Buying) မပြုလုပ်ကြရန်၊ တည်တည်ငြိမ်ငြိမ်ရှိကြရန်နှင့် လောင်စာဆီကို အလဟဿမဖြစ်စေဘဲ တတ်နိုင်သမျှ ချွေတာသုံးစွဲကြရန် တိုက်တွန်းထားကြောင်း သတင်းတွင် ဖော်ပြထားသည်။
