FIFA Asean Cup 2026 ပြိုင်ပွဲကို စက်တင်ဘာ (၂၁) ရက် စတင်ကျင်းပမ

ကမ္ဘာ့ဘောလုံးအဖွဲ့ချုပ် (FIFA) သည် အရှေ့တောင်အာရှဒေသတွင်း ဘောလုံးအဆင့်အတန်း မြင့်မားလာစေရန် ရည်ရွယ်သည့် FIFA ASEAN Cup 2026 ပြိုင်ပွဲကို လာမည့် စက်တင်ဘာလ ၂၁ ရက်မှ အောက်တိုဘာလ ၆ ရက်နေ့အထိ ကျင်းပသွားမည်ဖြစ်ကြောင်း တရားဝင်ထုတ်ပြန်ခဲ့သည်။ အဆိုပါပြိုင်ပွဲတွင် အာဆီယံဒေသတွင်းရှိ နိုင်ငံပေါင်း ၁၁ နိုင်ငံစလုံးမှ လက်ရွေးစင်အသင်းများ ပါဝင်ယှဉ်ပြိုင်ရမည်ဖြစ်သည်။ဤပြိုင်ပွဲသည် ၂၀၂၅ ခုနှစ်၊ မလေးရှားနိုင်ငံ၌ ကျင်းပခဲ့သော (၄၇) ကြိမ်မြောက် အာဆီယံထိပ်သီးအစည်းအဝေး (ASEAN Summit) တွင် FIFA ဥက္ကဋ္ဌ အင်ဖန်တီနို ကတိပြုခဲ့သည့်အတိုင်း ပေါ်ပေါက်လာခြင်းဖြစ်သည်။ FIFA နှင့် အာဆီယံတို့အကြား ၅ နှစ်သက်တမ်းရှိ နားလည်မှုစာချွန်လွှာ (MoU) ကို လက်မှတ်ရေးထိုးခဲ့ပြီးနောက် ဒေသတွင်းလူငယ်များအတွက် မျှော်လင့်ချက်အသစ်များနှင့် နိုင်ငံတကာအဆင့်မီ ကစားသမားများ ပေါ်ထွက်လာစေရန် ဤဂုဏ်သိက္ခာကြီးမားသော ပြိုင်ပွဲကို ဖန်တီးခဲ့ခြင်းဖြစ်သည်။ ပြိုင်ပွဲနှင့်ပတ်သက်သည့် အသေးစိတ်အချက်အလက်များကိုမူ FIFA က ဆက်လက်ထုတ်ပြန်ပေးသွားမည်ဖြစ်ကြောင်း သိရှိရပါသည်။