တာချီလိတ် FIN KTV မှ ဆူညံသံများကြောင့် ပတ်ဝန်းကျင်ဒေသခံများ နှစ်ရှည်လများ စိတ်အနှောင့်အယှက်ဖြစ်ရ

ရှမ်းပြည်နယ်အရှေ့ပိုင်း၊ တာချီလိတ်မြို့၊ ဆန်ဆိုင်း (ခ) ရပ်ကွက်ရှိ FIN KTV မှ ထွက်ပေါ်နေသော ဆူညံသံများကြောင့် အနီးဝန်းကျင်နေထိုင်သူများမှာ ၅ နှစ်ကျော်ကြာ အချိန်ရှည် စိတ်ဆင်းရဲမှုများ ကြုံတွေ့နေရပြီး အထူးသဖြင့် သက်ကြီးရွယ်အိုနှင့် လေဖြတ်လူနာများအတွက် နေထိုင်ရခက်ခဲလျက်ရှိကြောင်း သိရသည်။ အဆိုပါ KTV သည် အမိုးကို သွပ်ဖြင့် ဆောက်လုပ်ထားသဖြင့် အသံမလုံဘဲ နေ့ညမပြတ် ဆူညံနေသည့်အပြင် ဒေသခံ ၃၀ ကျော်က သက်ဆိုင်ရာဌာနများသို့ အကြိမ်ကြိမ် လက်မှတ်ရေးထိုး တိုင်ကြားခဲ့သော်လည်း လုပ်ငန်းရှင်များတွင် အာဏာပိုင်များနှင့် ဆက်စပ်သူများ၊ ထိုင်းနိုင်ငံသား ရှယ်ယာရှင်များ ပါဝင်နေသဖြင့် ထိရောက်သော အရေးယူဆောင်ရွက်မှု မရှိဘဲ ဖြစ်နေသည်။ ထို့ပြင် ၎င်းနေရာသည် ထိုင်းတရားခံပြေးများ လာရောက်လေ့ရှိသည့် နေရာတစ်ခုဖြစ်ကြောင်း ဒေသခံများက ဆိုကြပြီး သက်ဆိုင်ရာမှ အသံလုံစနစ်တပ်ဆင်ရန် သို့မဟုတ် ဥပဒေအရ ထိရောက်စွာ အရေးယူပေးရန် တောင်းဆိုထားကြကြောင်း သိရှိရပါသည်။