စင်ကာပူတွင် တယ်လီဂရမ်အလုပ်ခေါ်စာမှတစ်ဆင့် ငွေခဝါချမှုကျူးလွန်ခဲ့သည့် မလေးရှားနိုင်ငံသားနှစ်ဦးကို ထောင်ဒဏ် ၄ နှစ်ကျော်စီ အမိန့်ချမှတ်

စင်ကာပူနိုင်ငံအတွင်းသို့ အကြိမ်ကြိမ်ဝင်ရောက်ကာ လိမ်လည်ရရှိထားသည့် ငွေကြေး စင်ကာပူဒေါ်လာ ၁ သန်းနီးပါးကို ATM ကတ်များဖြင့် ထုတ်ယူပေးခဲ့သည့် မလေးရှားနိုင်ငံသားနှစ်ဦးဖြစ်သူ Chang Yang (၂၃ နှစ်) နှင့် Ivan Thong (၂၇ နှစ်) တို့ကို စင်ကာပူတရားရုံးက ယနေ့ (မတ်လ ၆ ရက်) တွင် ထောင်ဒဏ် ၄ နှစ်ကျော်စီ အသီးသီး အမိန့်ချမှတ်လိုက်ကြောင်း သိရသည်။ ၎င်းတို့နှစ်ဦးသည် တယ်လီဂရမ် (Telegram) ရှိ အလုပ်ခေါ်စာများမှတစ်ဆင့် ချိတ်ဆက်ကာ အစိုးရအရာရှိဟန်ဆောင်လိမ်လည်မှုနှင့် Alipay လိမ်လည်မှုများမှရရှိသော ငွေများကို ဘဏ်အကောင့်ပေါင်းများစွာမှ ထုတ်ယူပေးခဲ့ခြင်းဖြစ်သည်။ ၎င်းတို့အား ၂၀၂၄ ခုနှစ်၊ ဒီဇင်ဘာလတွင် ATM ကတ် ၅၁ ကတ်၊ ငွေသား ၃ သောင်းကျော်နှင့်အတူ ဖမ်းဆီးရမိခဲ့ခြင်းဖြစ်ပြီး၊ ထုတ်ယူပေးသည့်အကြိမ်တိုင်းအတွက် ကော်မရှင်ခအဖြစ် ဒေါ်လာ ၅၀၀ မှ ၆၀၀ အထိ ရရှိခဲ့ကြကြောင်း ဝန်ခံခဲ့ကြသည်။ ဤဖြစ်စဉ်သည် နိုင်ငံဖြတ်ကျော် ရာဇဝတ်ဂိုဏ်းတစ်ခု၏ လုပ်ရပ်ဖြစ်ပြီး အွန်လိုင်းပေါ်မှ လွယ်ကူစွာ ငွေရနိုင်သည့် အလုပ်အကိုင်များသည် ဒုစရိုက်ဂိုဏ်းများ၏ ထောင်ချောက်ဖြစ်နိုင်သဖြင့် အထူးသတိပြုရန် လိုအပ်ကြောင်း ဖော်ပြထားသည်။