မြန်မာနိုင်ငံမှ ၁၁ လအတွင်း ဆန်နှင့် ဆန်ကွဲ တန်ချိန် ၂ ဒသမ ၅ သန်းကျော် တင်ပို့ကာ ဒေါ်လာသန်း ၇၉၀ ရရှိ

မြန်မာနိုင်ငံသည် ယခု ၂၀၂၅-၂၀၂၆ ဘဏ္ဍာနှစ်၊ ဧပြီလမှ ဖေဖော်ဝါရီလအထိ ၁၁ လတာကာလအတွင်း ပြည်ပသို့ ဆန်နှင့် ဆန်ကွဲ တန်ချိန်စုစုပေါင်း ၂ ဒသမ ၅၀၆ သန်း တင်ပို့ခဲ့ရာမှ နိုင်ငံခြားဝင်ငွေ အမေရိကန်ဒေါ်လာ ၇၉၀ သန်း ရရှိခဲ့ကြောင်း မြန်မာနိုင်ငံဆန်စပါးအသင်းချုပ် (MRF) ၏ ထုတ်ပြန်ချက်အရ သိရသည်။ လအလိုက် တင်ပို့မှုများတွင် ဒီဇင်ဘာလ၌ တန်ချိန် ၃၃၁,၈၆၄ ကျော်ဖြင့် အများဆုံး တင်ပို့နိုင်ခဲ့ပြီး အောက်တိုဘာလတွင် ဒေါ်လာ ၉၂ သန်းဖြင့် ဝင်ငွေအများဆုံး ရရှိခဲ့သည်။ ယခုနှစ် ၁၁ လအတွင်း တင်ပို့မှုပမာဏသည် ပြီးခဲ့သည့် ၂၀၂၄-၂၀၂၅ ဘဏ္ဍာနှစ် တစ်နှစ်လုံး တင်ပို့ခဲ့သည့် တန်ချိန် ၂ ဒသမ ၄၈၇ သန်းထက် ကျော်လွန်နေပြီဖြစ်ကြောင်းလည်း MRF ၏ အချက်အလက်များအရ သိရှိရပါသည်။