ယူအေအီးရောက် ဖိလစ်ပိုင်လုပ်သားများ နေရပ်ပြန်ရန် တောင်းဆိုနေသော်လည်း လေကြောင်းလိုင်းများ ပိတ်ထားရဆဲဖြစ်

အရှေ့အလယ်ပိုင်းဒေသတွင် အစ္စရေးနှင့် အီရန်တို့အကြား စစ်ရေးတင်းမာမှုများ မြင့်တက်လာခြင်းကြောင့် ယူအေအီး (UAE) ရောက် ဖိလစ်ပိုင်နိုင်ငံသား တစ်ထောင်ကျော်သည် နေရပ်သို့ ပြန်နိုင်ရန် အကူအညီတောင်းခံထားသော်လည်း လေကြောင်းပိုင်နက်များ ပိတ်ထားရသဖြင့် နေရပ်ပြန်ပို့ရေးလုပ်ငန်းစဉ်များ ကြန့်ကြာလျက်ရှိသည်။ ဖိလစ်ပိုင်သမ္မတ မားကို့စ်က လက်ရှိတွင် လေကြောင်းနှင့် ကုန်းလမ်းခရီးစဉ်များမှာ ဘေးကင်းမှုမရှိသေးသဖြင့် မိမိတို့ရှိရာနေရာ၌သာ လုံခြုံစွာနေထိုင်ကြရန် တိုက်တွန်းထားပြီး၊ အခြေအနေပေးသည်နှင့်တစ်ပြိုင်နက် အစုလိုက်အပြုံလိုက် ပြန်လည်ခေါ်ယူနိုင်ရန် စစ်ဘက်ဆိုင်ရာ C-130 လေယာဉ်များအပါအဝင် အရေးပေါ်အစီအစဉ်များကို ပြင်ဆင်ထားကြောင်း သိရှိရသည်။