ပြည်တွင်းဘဏ်များတွင် ငွေသားထုတ်ယူမှု ပြန်လည်တင်းကျပ်လာကာတစ်ကြိမ်လျှင် ကျပ်သိန်း ၃၀ သာ အများဆုံးထုတ်ပေး၍ လုပ်ငန်းရှင်များ အခက်ကြုံနေ

မြန်မာနိုင်ငံအတွင်းရှိ ပုဂ္ဂလိကဘဏ်များတွင် ငွေသားထုတ်ယူမှု ပြန်လည်ခက်ခဲလာပြီး ဘဏ်တစ်ခု လျှင် တစ်ကြိမ်ထုတ်ယူပါက ကျပ်သိန်း ၃၀ ခန့်သာ အကန့်အသတ်ဖြင့် ထုတ်ပေးနေသည့်အတွက် အသေးစား လုပ်ငန်းရှင်များနှင့် အများပြည်သူများ အခက်အခဲဖြစ်ပေါ်နေကြောင်း စုံစမ်းသိရသည်။လကုန်ရက်နှင့် တိုက်ဆိုင်နေသည့် ယခုရက်ပိုင်းအတွင်း ရန်ကုန်မြို့ရှိ ပုဂ္ဂလိကဘဏ်အများစုတွင် ငွေသားထုတ်ယူရာ၌ ယခင်ကထက် ပိုမိုတင်းကျပ်လာခြင်းဖြစ်သည်။"ဒီတစ်ပတ် ငွေထုတ်ရတာ ပိုခက်လာတယ်။ ဘဏ်ထဲမှာ အပ်ငွေမရှိလို့ အများကြီး မထုတ်ပေးနိုင်ဘူးလို့ ဘဏ်က ပြောတာပဲ။ ဘဏ်မန်နေဂျာနဲ့ ရင်းနှီးတဲ့ လုပ်ငန်းအကောင့်ဆိုရင်တောင် ကျပ်သိန်း ၅၀ လောက်ပဲ တစ်ခါထုတ်ပေးတယ်" ဟု ရန်ကုန်မြို့ခံ အသေးစားငွေချေးလုပ်ငန်း လုပ်ကိုင်သူ အမျိုးသမီး တစ်ဦးက ပြောသည်။လက်ရှိတွင် ဘဏ်များက ငွေသားကို ကျပ်သိန်း ၂၀ မှ ၃၀ ကြားသာ ကန့်သတ်ထုတ်ပေးနေသဖြင့် လုပ်ငန်းရှင်အချို့မှာ တစ်ရက်လျှင် ဘဏ် သုံး ခု မှ လေးခုအထိ လှည့်လည်၍ ငွေထုတ်ယူနေရကြောင်း သိရသည်။အခြားတစ်ဖက်တွင်လည်း လမ်းဘေးရှိ ATM စက်များ၌ ငွေသားဖြည့်တင်းထားမှု မရှိသဖြင့် အခြေခံ ဝန်ထမ်းများမှာ ဘဏ်ဝန်ဆောင်မှုပေးသည့် လုပ်ငန်းများမှတစ်ဆင့် ရာခိုင်နှုန်းပေး၍ ငွေသားထုတ်ယူ နေရသည်။"ATM စက်တွေက ပိုက်ဆံထုတ်မရဘူး။ KBZ ဘဏ်ထဲမှာ KPay ကနေ ၁ ရာခိုင်နှုန်းပေးပြီး ထုတ်လိုက်ရတယ်။ ဘဏ်ကပါ ၁ ရာခိုင်နှုန်း ယူလာတော့ အပြင်မှာလည်း ရာခိုင်နှုန်းတွေ ပိုတက်သွား မလား စိုးရိမ်ရတယ်။ အခုထိတော့ တစ်သိန်းကို တစ်ထောင် (၁%) ပေးနေရတုန်းပဲ" ဟု ကုမ္ပဏီဝန်ထမ်း တစ်ဦးက ဆိုသည်။အထူးသဖြင့် အသုံးပြုသူအများဆုံးဖြစ်သည့် ကမ္ဘောဇဘဏ် (KBZ) ကဲ့သို့သော ဘဏ်များတွင် ငွေထုတ်ယူရန် အချိန်အတော်ကြာ စောင့်ဆိုင်းနေရပြီး ဘဏ်အားလုံး၏ ဝန်ဆောင်မှုမှာ လိုအပ်ချက် များစွာ ရှိနေဆဲဖြစ်ကြောင်း သိရသည်။