၂၀၂၅ ခုနှစ်အတွင်း ဗီယက်နမ်နိုင်ငံမှ တီလားပီးယားငါး (Tilapia) တင်ပို့သူများသည် အမေရိကန်ဈေးကွက်သို့ တင်ပို့မှုမှ အမေရိကန်ဒေါ်လာ ၅၃ သန်းကျော် ရရှိခဲ့ကြောင်း ဗီယက်နမ် ရေထွက်ပစ္စည်း ထုတ်လုပ်သူများနှင့် တင်ပို့သူများအသင်း (VASEP) ၏ ထုတ်ပြန်ချက်အရ သိရသည်။ ဤပမာဏသည် ပြီးခဲ့သည့်နှစ်ထက် ၁၇၃ ရာခိုင်နှုန်းအထိ မြင့်တက်လာခြင်းဖြစ်ပြီး ဗီယက်နမ်၏ စုစုပေါင်း တီလားပီးယားငါး ပို့ကုန်တန်ဖိုး၏ ၅၄ ရာခိုင်နှုန်းမှာ အမေရိကန်ဈေးကွက်မှ ရရှိခြင်းဖြစ်သည်။ပို့ကုန်များ သိသိသာသာ မြင့်တက်လာရခြင်း၏ အဓိကအကြောင်းရင်းမှာ ကမ္ဘာ့အကြီးဆုံး တီလားပီးယား ထုတ်လုပ်သည့် တရုတ်နိုင်ငံမှ ထွက်ကုန်များသည် အမေရိကန်၏ သွင်းကုန်ခွန် ၅၅ ရာခိုင်နှုန်းအထိ မြင့်မားစွာ စည်းကြပ်ခြင်း ခံနေရသောကြောင့်ဖြစ်သည်။ ထိုကွက်လပ်ကို ဗီယက်နမ်က အလျင်အမြန် အစားထိုး ဝင်ရောက်နိုင်ခဲ့ခြင်းဖြစ်သည်။ အထူးသဖြင့် အသားလွှာ (Fillet) ထုတ်ကုန်များမှာ ဒေါ်လာ ၄၀ သန်းအထိ ရရှိခဲ့ပြီး ၄၉၉ ရာခိုင်နှုန်းနီးပါး အဆမတန် မြင့်တက်ခဲ့သည်။
