ရွှေတိဂုံစေတီတော်မြတ်ကြီး၏ (၂,၆၁၄) နှစ်မြောက် ဗုဒ္ဓပူဇနိယတပေါင်းပွဲတော် စတင်ကျင်းပ

ရန်ကုန်မြို့၊ ရွှေတိဂုံစေတီတော်မြတ်ကြီး၏ (၂,၆၁၄) နှစ်မြောက် ဗုဒ္ဓပူဇနိယတပေါင်းပွဲတော်နှင့် နှစ်ကျိပ်ရှစ်ဆူဘုရား လှည့်လည်ပူဇော်ပွဲကို ဖေဖော်ဝါရီ ၂၁ ရက် နံနက်ပိုင်းတွင် စတင်ကျင်းပခဲ့ရာ ရန်ကုန်တိုင်းဒေသကြီး ဝန်ကြီးချုပ် ဦးစိုးသိန်းနှင့် တာဝန်ရှိသူများ တက်ရောက်ကြည်ညိုခဲ့ကြသည်။ အဆိုပါပွဲတော်ကို ဖေဖော်ဝါရီ ၂၁ ရက်မှ မတ် ၂ ရက် (တပေါင်းလပြည့်နေ့) အထိ ၁၀ ရက်တိုင်တိုင် ကျင်းပသွားမည်ဖြစ်ပြီး၊ သံဃာတော် ၁၂၀ ပါးက (၂၁၆) နာရီတိုင် အသံမစဲမဟာပဋ္ဌာန်း ရွတ်ဖတ်ပူဇော်သွားမည်ဖြစ်သည်။ ထို့ပြင် ပွဲတော်ကာလအတွင်း မတ် ၁ ရက်၌ ဆွမ်းဆန်တော်လောင်းလှူပွဲနှင့် မတ် ၂ ရက်တွင် ပွဲတော်အောင်ပွဲအခမ်းအနားများကို ဆင်ယင်ကျင်းပသွားမည်ဖြစ်ကြောင်း သိရသည်။