ဗီယက်နမ်လေကြောင်းလိုင်းများက အမေရိကန် ဘိုးရင်းကုမ္ပဏီထံမှ လေယာဉ်အစီးရေ ၉၀ ကျော် ဝယ်ယူရန် လက်မှတ်ရေးထိုး

ဗီယက်နမ်ကွန်မြူနစ်ပါတီ အထွေထွေအတွင်းရေးမှူး တိုလမ်၏ အမေရိကန်ခရီးစဉ်အတွင်း ဗီယက်နမ်လေကြောင်းလိုင်း သုံးခုက အမေရိကန်ဘိုးရင်းကုမ္ပဏီထံမှ လေယာဉ်အစီးပေါင်း ၉၀ ကျော် ဝယ်ယူရန် သဘောတူညီချက်များ လက်မှတ်ရေးထိုးခဲ့ကြောင်း သိရသည်။ Vietnam Airlines က ဒေါ်လာ ၈ ဒသမ ၁ ဘီလီယံတန်ဖိုးရှိ ဘိုးရင်း ၇၃၇ - ၈ လေယာဉ် အစီး ၅၀၊ လေကြောင်းလိုင်းသစ် Sun Phu Quoc Airways က ဒေါ်လာ ၂၂ ဒသမ ၅ ဘီလီယံတန်ဖိုးရှိ ဘိုးရင်း ၇၈၇ - ၉ Dreamliner အစီး ၄၀ နှင့် VietJet လေကြောင်းလိုင်းက ဘိုးရင်း ၇၃၇ - ၈ လေယာဉ် ၆ စီး တို့ကို အသီးသီးဝယ်ယူရန် စီစဉ်ခဲ့ကြခြင်းဖြစ်သည်။ ယခုကဲ့သို့ လေယာဉ်များ အမြောက်အမြား မှာယူခြင်းသည် ဗီယက်နမ်၏ လေကြောင်းလုပ်ငန်း တိုးတက်လာမှုကို ပြသနေသလို အမေရိကန်နှင့် ဗီယက်နမ်ကြား ကုန်သွယ်ရေးနှင့် နိုင်ငံရေးဆက်ဆံမှု ကောင်းမွန်လာခြင်းကိုလည်း ထင်ဟပ်နေကြောင်း ဆန်းစစ်သူများက သုံးသပ်ကြသည်။