ဘဏ်များမှ ငွေထုတ်ယူမှု ပိုမိုအဆင်ပြေစေရန် ဗဟိုဘဏ်က ညှိနှိုင်းဆောင်ရွက်ပေးလျက်ရှိ

ပြည်တွင်းဘဏ်များတွင် ရုံးဖွင့်ရက်များ၌ ငွေထုတ်ယူရလွယ်ကူစေရန် စီစဉ်ဆောင်ရွက်ထားရှိကြောင်း မြန်မာနိုင်ငံတော်ဗဟိုဘဏ်မှ တာဝန်ရှိသူတစ်ဦးက ၂၀၂၆ ခုနှစ်၊ ဖေဖော်ဝါရီလ ၈ ရက်တွင် ပြောကြားခဲ့ပါသည်။ ဗဟိုဘဏ်အနေဖြင့် ဘဏ်လုပ်ငန်းကဏ္ဍ တည်ငြိမ်စေရန်နှင့် အပ်နှံသူများ၏ အကျိုးစီးပွားကို ကာကွယ်ရန်အတွက် လိုအပ်သည်များကို ပေါင်းစပ်ညှိနှိုင်းပေးနေသည့်အပြင်၊ အစိုးရ၏ ဒစ်ဂျစ်တယ်စီးပွားရေးမူဝါဒအရ Digital Platform များနှင့် ငွေပေးချေမှုစနစ်များကို ပိုမိုအားကောင်းလာစေရန် အကောင်အထည်ဖော်လျက်ရှိသည်။ ထို့အပြင် နိုင်ငံတကာငွေပေးချေမှုများကို ဘဏ်များမှတစ်ဆင့် အဆင်ပြေစွာ ဆောင်ရွက်နိုင်ရေးကို အလေးပေးလုပ်ဆောင်နေပြီး၊ သတ်မှတ်စည်းမျဉ်းများနှင့်အညီ ငွေသားထုတ်ယူခွင့်ပြုရန် ဘဏ်များကို အကြိမ်ကြိမ် ညွှန်ကြားထားပြီးဖြစ်ကြောင်း သိရှိရပါသည်။