အလုပ်အကိုင်ရှာဖွေရေးအေဂျင်စီဖြစ်သော ဆုလာဘ်မြင့်မိုရ်ကုမ္ပဏီသည် အသက် ၂၀ မှ ၃၀ ကြား လူငယ်များကို တာချီလိတ်မှတစ်ဆင့် ဂျပန်နှင့် အိုမန်နိုင်ငံများသို့ အလုပ်ရရန် ပို့ဆောင်ပေးမည်ဟုဆိုကာ တစ်ဦးလျှင် ကျပ်သိန်း ၁၀၀ မှ ၁၅၀ အထိ ရယူပြီး စုစုပေါင်း ကျပ်သိန်းပေါင်း တစ်သောင်းကျော် လိမ်လည်ခဲ့ကြောင်း သတင်းရင်းမြစ်များက ပြောကြားထားသည်။ အလိမ်ခံရသူ လူ ၇၀၀ ခန့်သည် အလုပ်မရရှိဘဲ ထိုင်းနိုင်ငံ၊ ချင်းမိုင်နှင့် ဘန်ကောက်မြို့များတွင် သောင်တင်နေကြသည်ဟု စုံစမ်းသိရသည်။ ဆုလာဘ်မြင့်မိုရ်ကုမ္ပဏီသည် ယခင်ကတည်းက စည်းကမ်းမလိုက်နာမှုဖြင့် စစ်ကောင်စီ၏ အလုပ်သမားဝန်ကြီးဌာနမှ ရာသက်ပန်လိုင်စင်ပိတ်သိမ်းခံထားရသည့် အေဂျင်စီဖြစ်သော်လည်း ယခုကဲ့သို့ ဆက်လက် လိမ်လည်ကာ လူငယ်များကို ထိုင်းနိုင်ငံသို့ ပို့ဆောင်ခဲ့ခြင်းဖြစ်ကြောင်း သိရသည်။
